سب پہ رحمت کناں ہے رب جلیل حاکم دو جہاں ہے رب جلیل

محمد یونس خاں ہویداؔ (کراچی)

سب پہ رحمت کناں ہے رب جلیل
حاکم دو جہاں ہے رب جلیل

بانٹتا ہے وہ حکمتوں کے گہر
شاہِ کون و مکاں ہے رب جلیل

ذرہ ذرہ ہے ترجماں اس کا
عظمتوں کا نشاں ہے رب جلیل

اس کے رحم و کرم کا حال نہ پوچھ
سب کا روزی رساں ہے رب جلیل

اس کا جلوہ عیاں ہے ہر شے میں
ہر طرف ضوفشاں ہے رب جلیل

اس سے مایوس ہو کوئی کیوں کر
رحمتِ بیکراں ہے رب جلیل

اے ہویداؔ دعا کو ہاتھ اٹھا
تجھ پہ پھر مہرباں ہے رب جلیل